絲絲講場：派對文化送白玉 激情背後好傳統
中國派對文化（01532）專出Cosplay（角色扮演）服裝同性感內衣，絲絲前日先收到佢哋一個狼頭（絲絲仲因為咁，出賣咗個同事添，想知就睇尋日《絲絲講場》）。佢哋尋日首日掛牌，絲絲幾咁想知佢哋送紀念品畀港交所會有乜新奇搞作，結果真係估佢哋唔到，竟然係一件白玉，仲係一個傳統過傳統嘅巨型平安扣！
以為佢哋出Cosplay衫同性感內衣，就必定追求刺激嘅文化；點知佢哋話平安扣外型「通體圓滑」，代表「中庸之道」，平安扣內圈仲象徵公司「內心平靜安遠」咁話。
佢哋仲話，平安扣係中國傳統文化傳承，佢哋就致力於傳統文化與當代文化交融。係喎，Cosplay常時見有性感旗袍，睇怕係咁解。
件紀念品同個寓意都咁出人意表，中國派對文化今趟完全發揮出Party嘅精髓——就係Surprise！
余絲韻