絲絲講場 : 維珍妮招股會 送絕「細」好Bra
內衣股維珍妮（02199）下月8號掛牌上市，尋日招股記招率先送艷禮：係桃紅色Bra，女士們，唔好意思，一律係75B。嗱，維珍妮無偏心，在場男士一樣收到Bra，都係桃紅色，只不過Size就……唔知呢，事關係Mini版。
主席兼首席執行官洪游奕話，呢個Mini Bra嘅Idea係公司同事諗出嚟，想將維珍妮嘅技術濃縮反映喺呢個Mini版入面，當紀念品咁送畀大家。佢哋好認真，呢個紀念Bra，由設計到製造都係佢哋同事自己包辦，用咗兩個幾三個月先搞掂，禮盒同環保袋都有埋自家Logo。
桃紅襯晒公司顏色
點解係桃紅？洪主席大笑話「開心囉」，仲有就係維珍妮嘅企業代表顏色就係桃紅。哦，明晒。
不過，點解係75B呢？噢，絲絲唔記得問洪主席添。睇到呢度，若果你唔知呢篇文講緊嘅75B係乜，你可以問吓女朋友或女性朋友，無嘅話，就上網查，學海無涯。
同行往績承托力佳
睇番另一隻內衣股都市麗人（02298）舊年招股價3.6元，依家升到8.29元，股價何止有承托力，簡直有Push-Up效果。最新呢隻維珍妮，唔知有冇機會突圍呢！
余絲韻