絲絲講場 : Apple Watch救命 中學生雙贏
「Hi，我係蘋果CEO庫克。」電話騙案？仲衝出國際添！你呃絲絲唔到嘅。
原來係會發生的！庫克早排真係直接打畀個17歲中學生Paul Houle，請佢做出年夏季實習，兼送部iPhone畀佢。不過，呢啲機會唔係屬於你同絲絲嘅，事關呢位阿Paul同學幾乎冇命，全靠Apple Watch執番條命仔。
測出病徵 教主邀實習
話說嗰日Paul打完欖球，瞓埋覺兩個鐘後，望吓隻Apple Watch，發覺心跳仲係每分鐘145下，心口同背脊硬係唔多妥，即刻入醫院，嗰陣佢已經心、肝、腎開始喪失功能，爭啲就係咁先。
原來佢患咗「橫紋肌溶解症」，係種肌肉壞死引致中毒，搞到內臟喪失功能，隨時致死嘅病。個病點嚟？運動囉。
Apple教主庫克知道佢哋隻錶咁偉大後，立即收阿Paul同學做真正嘅教徒。今趟教主啱晒時間谷行隻錶同新iPhone，阿同學大難不死兼有後福，仲唔係雙贏。
余絲韻