提起Abercrombie and Fitch （A&F），你仲諗住紅褲大隻仔？性感囡囡？近年品牌改變形象，唔行性感大膽，洗底做返乖乖仔，希望扭轉銷售跌勢。不過，從咗良，唔再惹火，又畀人話無性格，原本班客仔又嫌悶唔Buy。A&F管理層都真係幾難做。
其實A&F都係今年先決定洗底，之前一直以大隻仔做招徠，有話題之餘，亦惹嚟好多是非。絲絲記得嘅，就有員工投訴返工嗰陣畀顧客性騷擾；又有前CEO杰弗里斯講明，只係預型人嚟幫襯，仲話唔會幫肥人做衫，結果畀人抨擊。有傳因為杰弗里斯講嘢太惹火，結果做咗22年嘅佢，舊年底「被退休」。
不過有分析話，之前A&F之所以咁受歡迎，正正因為建立咗鮮明嘅品牌形象，依家唔行性感路線，反而無咗個人風格，搞到同其他牌子冇乜分別，兩頭唔到岸。點樣可以唔「賣肉」都賣得，呢個答案，點只得A&F想知。
余絲韻