想入大企業做Intern（實習生），三字頭好似略為成熟咗啲，但又未必係絕望嘅。早排美國有位34歲嘅姐姐Anna Seacat，為博入IBM，不惜同啲學生仔爭IBM嘅Intern位，索性喺社交網站LinkedIn開Post，話自己幾想做「IBM至老嘅Intern」，即刻網上紅咗。
Anna姐姐好熱愛IBM，之前試個好幾次申請IBM嘅工，硬是過唔到IBM人事部嘅銅牆鐵壁。
今次出到「認老」呢招，成功搶Fo，網上人人轉推，連IBM行政總裁羅梅蒂個Friend都有Share，咁夠啦，即刻輪到IBM人事部主動打電話畀Anna姐姐，話睇吓點安排個電話Interview。
講得話「睇吓點」，即係唔包點。就喺Anna姐姐仲等緊電話時，招請Intern位告示已經喺IBM網站消失咗。所以話，搶到Fo，唔代表一切。
絲絲醒起，N年前有人嚟求職，絲絲請佢講吓佢有乜缺點，佢話「講到呢樣，我先要講吓我係處女座嘅」，吓？絲絲以為自己幻聽，然後佢再話「處女座最大嘅缺點，就係追求完美」……結果有冇請到佢？你估吓。
余絲韻