絲絲講場：Iron Man版S6天價買家玩失蹤
三星近期熱賣新款智能手機Galaxy S6 Edge早前宣布推出Iron Man（鐵甲奇俠）全球限量生產3,000部嘅限量版，大陸獲分配到1,600部，全數在京東商城獨家銷售，該網站於是將部分靚號碼以拍賣方式銷售，第一部發售嘅編號為66號嘅手機，經過連日共超過9.2萬次叫價後，日前傳來最後以568,788元人民幣，即超過71萬港元成交，較原價高出近80倍。
京東重新限時拍賣
正當絲絲也覺得認真誇張之際，殊不知昨日京東卻發聲明指，上述以高價逾56萬人仔拍出嘅限量版手機，因為最終買家玩失蹤，未能及時付款而宣布流拍，現即時重新再限時拍賣，特此公告各位機迷。
內地網友分析，呢部天價成交嘅66號手機，似乎係有人刻意抬高個價，好讓跟住嚟想拍嘅買家知點出價，據了解，京東商城拍賣會一直至本月底，靚號碼除咗重拍嘅66外，還包括520、1188、1314、888和1號機等合共有20部靚冧巴。究竟最終呢啲所謂靚冧巴會拍到乜嘢價，還真要拭目以待。但絲絲提醒各位買家，呢啲限量版香港定價8,888港元，大陸就賣7,288元人仔喎！
余絲韻