絲絲講場：中銀百年紀念鈔 想炒要等兩年
各位炒家收藏家，過多兩年又有銀行出紀念鈔啦！今次輪到中銀香港（02388）周年紀念，一七年慶祝立足香港一百周年，已經答應出紀念鈔與民同樂，但點講都仲有兩年，細節絲絲都未知，但就得到中銀香港副董事長兼總裁岳毅一句保證：「認購過程會是高效、簡單，不會為市民添麻煩。」
暗寸滙豐認購程序亂
呢句說話相信上星期去咗灣仔會展拎滙豐150周年紀念鈔嘅朋友應該明白當中含意，原本抽中嘅紀念鈔到手應該開開心心，點知指定時間去到都要排兩三個鐘，烈日當空下大家大汗疊細汗，不時傳出排隊人龍聲聲鬧爆銀行嘅晦氣話。
岳總話，睇咗今次滙豐嘅安排，佢地會吸取好嘅地方，不足嘅會檢討，會合理配置資源，希望到時大家踴躍認購。一講起中銀香港快到100周年岳總就眉飛色舞，話銀行見證香港一百年唔容易，中銀真係有好多歷史，所以一七年一定會好好慶祝。
余絲韻