絲絲講場：阿里請鼓勵師玩出火

阿里巴巴上星期出咗個招聘廣告，話請「程序員（即程式員）鼓勵師」，首要係「顏值對程序員有足夠震撼力」，仲話要韓星宋慧喬同AV女優蒼井空質素，又話要如蒼咁「胸懷天下，進可欺身壓海棠，退可提臂迎蛟龍」！絲絲仲以為自己睇緊乜。

咁份工做啲乜？負責讚美啲程式員喎，唔止要叫人起身同安排早會，仲要出差到唔同國家送上鼓勵。吓！人肉速遞？到底當班鼓勵師係乜？

好多網友睇到眼火爆，圍插阿里性別歧視，仲有人寸阿里請「慰安婦」。連內地男程式員都話，搞個咁嘅工作崗位，唔單止侮辱女性，仲侮辱埋佢哋男性程式員添。咁嘅事件，外國媒體緊關注啦...唉。

結果阿里嗱嗱聲修正兼道歉，話想用「幽默方式」招人才。吓！仲解釋！

余絲韻