啱啱個周末，股神巴菲特同拍檔芒格喺巴郡股東會上，同股東傾足七粒鐘，由投資講到捐身家乜都講。以下18句股神智慧，學嘢喇！
1. 講投資︰如果唔係咁多蠢人蠢事，我哋點會咁發呀？
2. 講投資喺垃圾食品業：食糖梗係有益啦！可以防止動脈過早軟化嘛...；我吸收嘅卡路里，有1/4係嚟自飲可樂；喺賣有機食品嗰間Whole Foods，我見唔到有人笑o架喎！
3. 講維權投資者︰我諗唔到有任何一個激進分子我會想同佢「對親家」；要頂得住激進嘅維權行動，最好咪就係畀啲堅嘅表現佢睇囉。
4. 講利率與通脹︰其實，我睇息口錯晒。好難令人相信揸直升機四圍掟錢會無通脹，點知真係無喎。
5. 講美元︰我覺得美金可以做多50年全球儲備貨幣。
6. 講歐元區︰佢哋搞咗啲戇居嘢出嚟，你點都唔會傻到搵你最窮嗰個酒鬼老襟夾份搞生意吓話？！
7. 講銀價︰我哋已經唔諗銀囉喎。
8. 講德國企業︰我預測5年內我哋會買至少一間德國公司。相較5年前，我地（目及）得多咗。
9. 講巴郡裁員︰我未聽過有邊間公司明知唔使咁多人，都仲要請咁多。
10. 講經濟師︰計我哋話，啲公司請一個經濟師都嫌多！
11. 講回購股份︰比起其他公司議題，硬係有人喺回購股份問題上，寫更多同做更加死蠢嘅嘢；只有當股價低過實際價值時，先應該回購。
12. 講最低工資︰我唔反對加最低工資，但我覺加親實搞亂檔。
13. 講稅制︰聽到啲美國商界呻交稅，我一滴眼淚都唔會為佢哋留。
14. 講理性︰理性係道德上必須嘅，無理由無止境咁笨o架。
15. 鐵路帶挈巴郡賺錢，講到列車意外︰如果年年百萬百萬哩咁行法，總有啲嘢會發生嘅。
16. 講互聯網︰正！個網改變我一生，但都只不過使我100蚊美金一年！
17. 講食西蘭花︰如果成日食埋嗰啲西蘭花、椰菜仔呀咁，我肯定無咁命長。
18.講捐身家︰下邊（死後）無福布斯400富豪榜o架！
余絲韻