絲絲講場：四叔掃貨毋忘新地

買80萬股用近億元

新地上個禮拜五公布全年業績，雖然純利下跌，但基礎盈利就交到貨，升15%，四叔喺業績公布後嘅第一個交易日即刻郁手，喺場內增持80.2萬股新地，每股平均價117.808元，涉資一億有找，好倉由0.13%升至0.16%。

四叔多次喺公開場合講過「買地產股好過買樓」，睇嚟佢眼中嘅地產股包括埋新地。

呢排四叔集中買入自己旗艦公司恒地，最新一次亦係今個星期一，喺場內增持45.7萬股，以每股均價55.702元計，只係用咗2,545萬元，細數目啫。

連續13日增持恒地

連埋呢次，四叔已連續13個交易日掃恒地股份，涉及超過12億元，持股量升到67.64%。

睇番四叔掃新地嘅往績，次數唔多，對上一次係今年五月七日，當日又係兩隻一齊掃，加埋都唔使三千萬元。

大孖沙通常只會增持自己股票，好少減持，小股東係咪要跟就自己判斷啦。

余絲韻