憑《Liar's Poker》一書走紅嘅Michael Lewis（米高‧路易士），自一○年出書剖析房貸風暴同信貸違約後，事隔四年再度出擊，最新著作《Flash Boys》解構高頻交易背後嘅運作！佢接受訪問時就話，喺呢班高頻交易員面前，即使係聲名大噪嘅大鱷包括美國對沖基金經理David Einhorn（艾因霍恩），都只不過係「賭場中普通嘅過客」！
所謂高頻交易其實就係利用特定嘅運算系統、電腦同編碼進行交易，從而比一般人快兩毫秒，即千分之二秒知道股價走勢！米高形容交易所就好似一個賭場咁，高頻交易員係入面真正落注嘅賭客，而銀行、券商只係去遊覽賭場旅行團，負責落單。
佢解釋，每個投資者都唔知道每個交易背後其實已經被操縱，「就如艾因霍恩每次想交易嘅時候，好似有人喺佢落盤之前偷步買入，但佢唔明背後原因，因為佢唔明白高頻交易員早佢一步利用電腦程式知道落盤動向。」米高仲直言，艾因霍恩只係「賭場」裏面其中一個普通嘅遊客！
之不過，究竟艾因霍恩係真唔知，定係知咗都束手無策呢，咁就真係要問返佢本人先知！
余絲韻