稻香（00573）一年一度嘅「壹蚊雞」又嚟喇，絲絲記得舊年因為食客太瘋狂，稻香唔夠雞賣，結果要提早結束優惠。絲絲聽行政總裁梁耀進（Eric）講，今年做足準備，每日有一萬隻雞應市，相信唔會再腰斬，食客可以大飽口福啦！
「壹蚊雞」年年都好受歡迎，舊年就有唔少網民上載相片話挑戰食雞大賽，鬥食得多雞，Eric坦言，舊年反應超乎想像，令內地嘅自家雞場都斷晒市，按年賣多三成添。
不過佢就話有唔少人淨係食雞脾、雞翼，其他部分唔要，好嘥！所以今年雖然依然畀食客任叫，但係就推廣「惜食」文化，加強「半蚊雞」優惠，即係畀5毫子食半隻雞，仲同社會企業惜食堂合作，若果埋單計，每人平均食半隻雞，稻香就會捐一蚊畀惜食堂，食客仲有Coupon添。
「壹蚊雞」曾經同光大銀行（06818）、秋官（鄭少秋）並列「跌市明燈」，但睇番「壹蚊雞」自上星期五推出，期間港股不跌反升，睇嚟「壹蚊雞」可以除名喇喎！
近年餐飲業請人好難，尤其係洗碗、傳菜等基層工作，Eric話稻香就好重視員工，愈低層加得愈多人工，整體人工加幅係3.4至3.5%，但係洗碗、傳菜加足一成，侍應亦加5%，聽講洗碗由七千蚊加到萬一蚊喇，但缺人情況仍然無乜改善。
余絲韻