絲絲講場:股神「斷訊」唔益高頻交易

股神巴菲特拍檔芒格(Charlie Munger)喺舊年以「邪惡」嚟形容高頻交易商,仲話佢哋有如「糧倉嘅老鼠」。

今年股神更以實際行動表達不滿,旗下業績發布機構Business Wire(BW)唔再為佢哋提供收費嘅特快資訊,等班高頻交易商無可乘之機賺「快」錢。

黃金幾秒舞高弄低

原來BW以往會向高頻交易商提早一至兩秒發布業績報告,唔好以為多一兩秒做唔到啲咩,對於高頻交易商絕對係搵大錢機會。

美股每日通常喺東部下晝4點收市,業績報告等亦喺呢個時候發布,但問題係4點後幾秒股市仍有交投,高頻交易商往往就利用呢黃金幾秒狂沽業績差嘅股份,大手掃入業績好嘅股份。

有次試過四點正收到護膚品股Ulta Salon C&F嘅失望業績,高頻交易商利用收市後嘅0.05秒拋售價值80萬美元股票。

今次BW維護市場公義,連紐約州總檢察官Schneiderman都大力表揚,佢仲話高頻交易其實即係內幕交易2.0,但計絲絲話,上市公司大可以喺4點稍後先至發布業績報告,咁就唔使引人犯罪,益晒班高頻交易商啦。

余絲韻