智能手機生產商黑莓（BlackBerry）中止賣盤計劃，轉為重組救亡，被委任為臨時行政總裁嘅程守宗（John Chen）原來係喺香港出世，七三年移民美國，喺科技界以重組專家見稱，有分析仲話如果黑莓兩名創辦人一一年底下台後即由佢接棒，依家就唔使搞成咁，可見對佢寄望甚殷。
58歲嘅John過去最為人津津樂道嘅，莫過於將數據庫公司Sybase起死回生，佢喺九七年加盟Sybase，之前連蝕四年，研究機構Gartner甚至預言有七成機會「死亡」。點知佢入咗去之後，將發展焦點轉到當時尚在起步階段嘅流動資訊管理，結果食正潮流，成功扭虧為盈，○九年以58億美元高價，賣畀德國軟件巨擘SAP，作價等於佢入去時嘅15倍，直至今年初離開。
John曾經講過，將Sybase出售就好似嫁女咁，又話自己會繼續留喺科技界，因為冇其他技能咁喎。佢暫時未有透露佢嘅重組大計，但強調黑莓短期內絕不再賣盤。
不過，黑莓重組要同時間競賽，因為唔計新注入資金，以上季燒錢5億美元嘅速度推算，公司手頭26億美元現金大概喺明年底耗盡，以黑莓嘅情況睇，幾乎係「mission impossible」，絲絲真係替John擔心。
John掌舵Sybase前，曾喺西門子、Pyramid Technology等擔任高層，亦曾喺喬治布殊總統年代擔任出口局要職。佢今年初加盟私募基金Silver Lake，擔任高級顧問，現時仲係迪士尼同富國銀行董事。
余絲韻