絲絲講場：中銀助基層享數碼生活

好多人鍾意追潮流，電腦Model舊咗就拎去賣，然後換過部新機。其實，如果唔等錢使，絲絲就建議大家拎部舊電腦去回收，等佢哋成為再生電腦，畀有需要用嘅人享受數碼生活嘅方便。

捐再生電腦 贊助軟件

中銀香港最近就用100萬資助電腦工場，送贈2,000台再生電腦畀基層家庭，又拎多100萬元出嚟，畀基層家庭更換電腦周邊設備同購買軟件等等。

事實上，中銀香港自○六年起，已經將再生電腦捐畀唔同嘅非政府組織。舊電腦可以循環再用，環保得嚟又幫到有需要嘅人，何樂而不為？除咗出錢，李永逵仲率領IT部同事教導過百名小朋友用電腦，幫基層家庭打破數碼隔膜。

余絲韻