絲絲講場:科大蟬聯花旗分析賽

花旗集團一向熱心於培育未來領袖,早排仲舉行咗第十一屆花旗集團國際案例分析比賽,吸引18支嚟自13個國家同地區嘅隊伍參加,當中香港科技大學隊伍喺國際案例分析比賽中脫穎而出,連續兩年奪冠。

今次花旗集團出嘅題目都幾特別,絲絲聽聞參賽隊伍要喺24小時內,為周大福珠寶集團所面對嘅策略性難題,提出可行嘅商業方案。

周大福案例比試策略

中國消費市場急速變化,絲絲相信周大福唔多唔少都會面對挑戰同機遇。通過分析現實生活中嘅商業案例,除咗為學生提供一個極好嘅學習機會,仲可以鍛煉佢哋解決問題嘅能力。

科大團隊就憑住創新同務實嘅解決方案,成功衞冕。聽講周大福嘅代表對同學嘅表現評價幾高,仲話部分建議非常接近公司喺實踐中希望達到嘅目標。學生咁努力,效果咁好,唔怪得花旗集團香港及澳門區行長盧韋柏話,會繼續支持同類計劃,培育勇於承擔嘅未來領袖啦!

余絲韻