當市場預期今年美國應該加息三次或四次的時候，都相當着眼美國通脹數據，而大部分分析都指今年美國通脹仍然溫和，但其實推動通脹的重要元素──能源價格，這半年來升咗好多，只係因為滯後問題令目前通脹看似不受影響。
美國輕質原油做價，由去年十一月的不足50美元一桶，上升到目前的68美元，升幅係36%，而最大問題係地緣政治令油價短期內都難以回落。
睇番美國CPI跟CPI能源指數走勢一直係同步，能源價格CPI大概佔美國CPI的7至9%比重，油價每10%的變動，都會令CPI出現0.2至0.3個百分點變化，所以只要當前油價再突破70美元，市場氣氛會轉為擔心通脹會急速升溫。
如果油價真係如沙特阿拉伯估計，去到100美元一桶，估計到時的資產價格將會大跌。
所以上周特朗普都開聲指摘高油價係沙特刻意造成，佢認為目前供應充足，油價無可能急升。不過，佢忽略咗個更大問題──「市場預期的供應」。
首先美國有可能再次制裁伊朗，伊朗每日供應300萬桶以上石油；其次係俄羅斯跟歐美關係惡化，石油、天然氣係俄羅斯可抗衡歐美制裁的武器，依家中美貿易戰搞到滿城風雨，帶動商品價格抽升，這一連串危機只帶出一個結果，商品價格上升，PPI隨後會跟升，之後就係CPI。
下半年的經濟唔太樂觀，息口上升必令資產價格調整，另一個大問題係A股納入MSCI後，資金會棄港入A，部分香港資金會被抽回內地買A股，美國落實減稅，喺香港泊岸避稅的美國公司資金亦會抽離香港。
這些問題喺農曆新年前係未曾出現，當時氣氛相當好，但經過三、四月的變化後，似乎大形勢漸漸成形。五至六月股市應該仍受不少壓力。投資者要點耐性，至少要等到中美貿易談判有成果才入市，現階段地雷處處，不宜冒進。
由任職國際大行到創業揸莊，經歷無數金融巨浪，以識見捕捉趨勢，博高Fund，也要有Fun。
作者：微子