絲絲講場：徽商八達通投資者勁冧

徽商銀行創意十足，送張人人啱使嘅八達通卡，仲細心幫你充夠一百蚊，即收即用。送禮都不忘賣廣告，呢張八達通卡既其中一面，貼咗徽商銀行信用卡嘅貼紙，仲要係金黃色嗰隻，等各位潛在大客喺嘟一嘟時都諗起徽商，夠晒高招！絲絲聽講在場嘅投資者及分析員不知幾鍾意呢件禮物，一人一份都仲唔夠，有人仲要問公關再拎。

重行大送電腦配件

另一邊廂，重慶銀行送出一隻無線Mouse同USB手指，白色Mouse配上銀色卡片型手指，外形唔錯，都有一定實用性。依家個個都係電腦人，呢啲配件唔少得，所以都好受投資者歡迎。不過，講到最實際，就緊係要睇下兩家銀行嘅招股價，有冇水位喇。