富豪離婚往往為咗分身家要吵到上法庭，令到昔日愛人變仇人。好似內地創業板公司神州泰岳董事長王寧同前妻安梅嘅離婚案件，都搞咗近兩年，到近日先至有結果。
根據神州泰岳嘅公告，安梅最後會分到前夫持有嘅一半神州泰岳股份，用公告發布前嘅收市價計，呢批股份市值高達14.6億人民幣，可以話係創業板市場到現時為止最昂貴嘅離婚！
名作家錢鍾書喺小說入面將婚姻比喻為一座「圍城」，城外嘅人想入去，城裏嘅人想逃出來。依家要結婚，酒席、蜜月旅行等使費計埋閒閒哋十幾萬，而要逃出「圍城」同樣代價不菲，尤其係各位富豪，更加要有心理準備，要同人分家產。
絲絲粗略計過，淨係一一年到依家，就有最少14個A股上市公司高層離婚，當中唔少「前妻」因為財富再分配而一夜暴富，好似三一重工副總裁袁金華嘅前妻王海燕，就因為分到22億元人民幣身家，成為舊年《新財富500富人榜》嘅新進女富豪。
根據王寧同前妻安梅達成嘅協議，雖然一半股份會過戶畀前妻，但呢批股份嘅表決權仍然會喺王寧手上，以保持佢對神州泰岳嘅控制。但小股民仍擔心安梅會狠心減持，尋日神州泰岳股價就因此跌逾8%。
余詩韻