絲絲講場：卡賓老闆DIY上市戰衣
「COOL魔」熱潮未散，仲殺入新股添。絲絲據聞今日開始招股嘅內地男裝服飾公司卡賓（02030），請咗Chi Lam（張智霖）撐場，出席今日舉行嘅投資者推介會，而身為創辦人、主席兼首席設計師嘅Cabbeen（楊紫明）亦都唔輸蝕，專程設計咗件戰衣，尋日喺記者會已經亮相。
新股推介「COOL魔」撐場
卡賓係主打自家設計同埋品牌，尋日記者會除咗有一眾高大威猛嘅Model展示一系列自家品牌作品之外，人稱Mr. Cabbeen嘅老闆亦都有備而嚟。話說尋日佢出席記者會，有別於一般公司老闆「西裝骨骨」嘅打扮，絲絲聽在場嘅賓架講，話呢件衫係Cabbeen特登為咗上市設計，着住件戰衣，零舍唔同喎。
市場瘋傳「COOL魔」侵襲今日舉行嘅投資者推介會，絲絲八卦問吓公司管理層，原來佢哋睇中咗「COOL魔」張智霖健康、陽光嘅正面形象，仲話覺得佢有衣着品味。咁會唔會請「COOL魔」做埋代言人？公司就好口密，只係笑笑口話「唔排除有合作機會」。
余詩韻