絲絲講場：微軟保曼淚灑歡送會

呢個難得嘅場景，發生喺日前嘅員工晚會，兼保曼歡送會。保曼好快會正式離開微軟，呢個月忙於公司幫佢搞嘅退休歡送會，首站係西雅圖市郊嘅總部。

喺大會入面，保曼播咗米高積遜嘅Wanna Be Startin" Somethin"，仲聞歌起舞添。佢揀呢隻歌，係因為八三年首次參加員工聚會時，就係播呢隻歌，事隔三十年，再聽返隻歌，百般滋味在心頭，平日幾硬淨都好，呢舖真係忍唔住喊咗。

傳福特穆拉利接班

保曼就快走，但繼任人係邊個都未知，有傳聞話會由福特CEO穆拉利（Alan Mulally）頂上，成為微軟歷來第三位CEO，不過當事人就例牌否認！穆拉利一直堅持唔會「過檔」，不過近排好似有啲動搖！最近盛傳福特董事局同意穆拉利可以喺合約期前退休，加上穆拉利一直都想返西雅圖工作。