絲絲講場：梁啟棠傳高薪加盟摩通
絲絲收到可靠消息，專睇和黃（00013）嘅瑞信證券研究部董事梁啟棠（Cusson）喺出埋和黃中期業績Report之後，告別瑞信另謀高就，聽聞個Pay仲幾好添！據悉Cusson會加入摩通區內證券嘅部門主管，並且兼睇埋地產股，即係話Cusson會繼續分析埋成個長和系？
分析和黃獨到顯身價
查實要睇和黃咁大間綜企，少啲功架都唔掂，Cusson算係少數可以同和黃管理層全接觸嘅分析師，相信亦係佢嘅身價所在，難怪外資大行高薪挖角。睇嚟Cusson第日壓力都唔細，所以佢依家仲放緊大假，趁機會嘆返夠本先。
絲絲睇番Cusson近期分析，佢早排大大聲話個別地產股，好似新地（00016）同恒地（00012）市帳率已經跌穿○三年「沙士」嗰陣嘅水平，仲贊同四叔嘅「買地產股好過買樓」論，仲話係入市良機添！唔通係臨別秋波大派貼士？