絲絲講場:入財圈考CFA着數多

近年愈嚟愈多矢志投身金融界嘅畢業生,都會報考CFA(特許財務分析師),日前CFA協會就公布咗今年六月份嘅考試成績喇,第三級合格率得49%,同過去十年嘅平均合格率54%有一段差距喎!究竟揸住CFA個銜頭又係咪咁架勢先?絲絲問咗幾個老友記!

入外資行有分加

一畢業就成功考取CFA專業資格嘅新鴻基金融財富管理策略師蘇沛豐就話,對畢業生而言,由於CFA課程涉獵多元化範疇,有助考生擴闊金融界知識,奠下根基,入行會有分加,亦會較易取得入場券。

佢又話,環球市場相關性愈嚟愈大,股、債、商品、結構性產品息息相關,相信更多金融界人士考取CFA,可提升行業標準同專業性,佢會建議有志者報考。

另外就有個中資分析員就好坦白咁話畀絲絲知,外資行會特別睇重,而且大勢所趨,啱啱畢業嘅學生哥,都係要有「一牌在手」先有優勢,再唔係就要有master、MBA、甚至PHD。佢仲話,讀咗CFA,有咗基礎知識,做分析或其他範疇都易啲上手,但佢就話現實工作,就梗係深入好多啦!

不過,有個美資大行研究部副總裁嘅老友就話,自己以前淨係考咗Level 1,但覺得依家多人考CFA或者合格率低唔代表啲乜,始終係入行其中標準之一,不過佢相信多咗擁有專業資格,可以提高入行嘅難度,即係行業水準可以升呢。咁佢咁多年經驗,又點同吖。