絲絲講場：藺常念睇車份上唔退休

無見藺sir一排，尋日就喺智易金融集團附屬嘅智易東方證券成立慶典見到佢，原來佢已經做咗智易東方證券行政總裁，不過佢笑笑口話，本身已經諗住退休o架喇，但係有一日，智易金融集團行政總裁梁衞漢約咗佢傾偈，跟住佢就畀一樣嘢打動咗！

加盟新公司以客為先

能夠引誘到藺sir梗係非一般卡士啦，原來梁衞漢畀咗條賓利（Bentley）車匙佢，話如果佢應承，架賓利就可以日日車佢返工，就係咁，佢就答應咗喇！

不過都唔止咁簡單嘅，藺sir唔肯透露有幾高薪厚職，淨係話買得起豐田（Toyota）以至Lamborghini（林寶堅尼），哇，呢個range都好闊啫。

藺sir大嘆依家證券業好難撈，話有啲行家以平佣頂爛市，又用靚女做宣傳，仲話證監會搞風險評估，係「殺雞取卵」，阻礙行業發展，所以佢去到新公司嘅新目標就係「生存」，以服務為先，幫客戶賺錢。

佢仲教路話，市場總有生存空間，要逆流而上，就要快人一步先搵到錢！

余詩韻