絲絲講場：LME第一交椅好「燙手」
港交所（00388）高層尤如車輪轉，旗下倫敦金屬交易所（LME）行政總裁艾博賢早前宣布做到今年底就唔撈，外間非常關心邊個會做佢嘅接班人，事關LME呢排新聞多多，捲入操縱商品價格嘅指控，因此邊個會接手呢個「燙手山芋」，格外令人關注。
兩候選人均熟商品
彭博尋日就引述消息話，LME正考慮緊三個接任人選，包括LME營運總監Diarmuid O'Hegarty、同NYSE Liffe前行政總裁Garry Jones等。
兩人各有千秋，O'Hegarty係LME「老臣子」，九八年已加入，做咗15年，非常熟悉LME運作，佢之前係LME副行政總裁，依家轉做營運總監。至於Garry Jones，一二年先至由NYSE Liffe退下，有大把商品期貨經驗。
涉及訴訟 手尾恐多
有市場人士就話，無論邊個做LME行政總裁，都係極大考驗，事關依家LME涉及集體訴訟，預期陸續有來，即係有排搞，兼手尾長，搞足幾年都不在話下。萬一真係畀人告得入，就更加係「無底深潭」！港交所同LME對候選人報道冇評論。
余詩韻