絲絲講場：華為加薪7成挽人才
逆市減人工大家就成日聽見，但逆市加人工你又聽過未呢？絲絲聽講，內地嘅電信設備供應公司華為嘅一班員工好開心，事關公司嚟緊八月將會大幅度提升佢哋嘅人工，基層員工平均加薪就去到30%，有部分員工仲加薪超過70%，就連應屆畢業生嘅入職起薪點都由6,000蚊人民幣升到去9,000至1萬蚊人仔呀！
半年傳賺過百億
其實華為不嬲都有豐年獎賞員工嘅傳統o架！早喺一○年，華為都因為業績好而加薪11.4%！雖然華為近年成日畀美國政府「留難」，一時又話佢幫中國政府喺美國開展網絡戰，一時又話佢係中國間諜，不過華為仍然賺大錢！絲絲聽聞外界指華為上半年嘅利潤超過100億元人民幣呀！
絲絲仲收到風，今次華為加人工另一個原因係想留住班有潛質嘅員工。雖然今次加幅同員工嘅工作年資與個人表現有關，但係中基層人才一般都可以有三成嘅加薪幅度，事關公司覺得佢哋嘅思想夠新，而且對工作又有熱誠，係公司未來嘅管理層，所謂「肥水不流外人田」，加咁多人工都係想留住班人才咋！