依家無論做邊行生意都要講求「國際化」，最近內地證券界就傳出一單國際收購交易，當中更涉及英國同法國兩個歐洲大國添！內地廣發證券宣布，子公司廣發期貨（香港）啱啱完成咗第一宗海外收購，收購對象係英國NCM期貨公司；而呢間NCM期貨公司，原來又係屬於法國外貿銀行旗下嘅一間子公司，絲絲就覺得中間啲關係認真錯綜複雜！
聽講今次交易已經得到英國有關監管當局批准，交易金額初步係3,614萬美元（約2.82億港元），但最終都要根據NCM期貨公司嘅淨資產再作調整。雖然交易金額未定，不過就肯定廣發期貨（香港）全部都會用現金支付，聽落非常符合內地公司嘅作風！
廣發證券發言人話，由於NCM期貨公司擁有多個主要期貨交易所，包括倫敦金屬交易所嘅結算會員資格，所以收購咗NCM期貨公司就等如可以直接進軍歐洲期貨市場，係公司國際化嘅第一步咁話。