絲絲講場:樂桃旺到老闆買唔到飛

樂桃航空(Peach)首航至依家啱啱好一年,而開通香港至大阪線更只係短短近九個月。作為最大外資股東——第一東方投資集團董事長諸立力(Victor)都話意想不到咁成功,連佢自己都試過今年一月份訂唔到飛,迫於無奈要坐國泰(00293),貴過樂桃好多!

首航9個月錄百萬客

由於樂桃機票較平而且可預訂10個月內嘅機位,對於一向視日本為第二個鄉下嘅港人梗係好吸引,所以Victor話航班由開始到依家一直好full,而且機上多數係年輕人,仲笑話好似佢嘅年紀就好少數喇!

睇番資料,樂桃舊年首航9個月,已錄得超過100萬名乘客,比預計早咗一個月達標,其實樂桃依家除咗香港線外,仲有首爾同埋台北線,Victor指呢幾條線嘅成績好好,自己作為投資者就當然收貨啦,話畀到成90分,不過仲有進步空間咁話!絲絲係精明消費者,當然想樂桃開得愈多航點愈好,咁樣大家都有着數嘛。