絲絲講場:領匯呼籲女性挺身而出

渣打早前做咗個調查,本港50間恒指成分股當中,女性董事比例只佔9.4%,實際數目只有61位,領匯(00823)主席蘇兆明(Nicolas)話佢哋已經有實際行動支持女性出任董事。

佢覺得只係依家好多公司嘅董事會會搵番現職董事,所以先限制咗女性嘅比例。

Nicolas認為香港有好多成功嘅女性企業家,做公司董事可以話係超班,不過好多公司請新董事成員嘅時候,貪就手搵番其他公司嘅現職董事。佢建議女性可以更多表達為董事會服務嘅意願,同場嘅橋水基金總裁Eileen Murray仲呼籲,各位做董事嘅姊妹要多啲互相幫忙添。

上月委任兩女非執董

睇番領匯本身,二月份委任咗兩位姊妹入董事會做非執董,分別係渣打香港執董陳秀梅,同埋精品服務式公寓品牌「莎瑪」嘅創辦人Elaine Young,見到領匯咁身體力行支持女性董事,絲絲當然想知道領匯有無計劃邀請更多女性入董事會啦,Nicolas就打趣咁講,都要等現有董事退休,先至有空位畀其他新董事o架。