- on.cc 東方互動主頁
- 3月13日 (四)
歐盟想話向其他國家嘅航空公司抽碳排放稅，點知其他國家合共29國嘅代表，日前喺俄羅斯莫斯科開大會，齊齊耍手兼擰頭，中國同東道主俄羅斯都開到聲話唔制，搞到歐盟好冇癮，惟有暫時晒冧，歐盟嘅交通專員話抽碳排放稅嘅事可以靈活處理咁話！
點知歐盟嗰頭話有商量，呢頭就想轉移目標，有聲氣放出嚟話，歐盟又想抽航海碳排放稅喎！報道話歐盟財長會議講起，歐盟委員會將會喺今年六月，拋出全球航空同航海運輸行業碳排放稅嘅報價單，簡單嚟講，即係航海業都要抽埋碳排放稅！
唔使講自然又係噓聲四起，好似中國國家發改委就即時炮轟歐盟要求唔符合法律要求，違反咗國際公約同國際法原則咁話。有分析就話，歐盟之所以想抽碳排放稅，其實係歐洲各國呢輪荷包唔掂，所以想巧立名目抽稅幫補吓。今次遇到抵制，自然係死心不息，既然航空碳排放稅搞唔掂，就搞個航海碳排放稅出嚟，增加下談判籌碼，希望點都有樣錢落袋。歐盟呢招都算辣，睇嚟其他國家又要諗諗計喇！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
