渣打集團（02888）經過咗洗黑錢風暴，仲要面對單一大股東－新加坡主權基金淡馬錫隨時減持股權對股價所引起嘅波動，但集團仍然錫住行政總裁冼博德，向佢授出789股普通股嘅購股權，以示獎勵！
起初絲絲以為渣打之前被指控洗黑錢，應該對管理層小懲大戒，不過渣打都好慷慨，繼續獎勵高層。睇番啲細則，有兩點幾特別。
首先係個行使價，只係11.4英鎊，較股份授出日喺倫敦證券交易所嘅收市價為14.36英鎊，折讓兩成，即係佢依家已經帳面賺咗兩成，絲絲見好多公司嘅購股權行使價，同當時嘅市價差唔多，第日間公司做得好，股價水漲船高，就可以用較低價換到正股。渣打嘅做法，證明佢哋對冼博德好好。
第二個特點，係呢批購股權只有半年時間行使。根據渣打通告，購股權喺發出後三年屆滿後嘅六個月可以行使，如果咁啱嗰半年個市唔就，又或者銀行咁啱行正衰運，購股權變廢紙都唔定。總括而言，呢次獎勵有辣有唔辣。