德國總理默克爾一直出盡九牛二虎之力，嘗試力保希臘繼續留在歐元區嘅時候，估唔到希臘政客反而睇中一位德國高中經濟科老師Christian Gelleri嘅傑作，就係佢喺○三年，帶住班學生「柴娃娃」咁發行嘅地方貨幣「基姆高」（Chiemgauer）。
絲絲知道，Gelleri老師早前仲被邀請到訪希臘，親自講解「基姆高」能夠抗衡歐元危機對經濟打擊嘅奇妙之處添。
「基姆高」發行第一年，流通量只有7.5萬歐元；時至今日踏入第九個年頭，流通量已經高達600萬歐元，活躍使用者有2,500多人，接受商店超過600家，搖身一變成為歐洲最成功嘅地方貨幣。
「基姆高」有促進小鎮經濟之效，全因為佢「肥水不流別人田」嘅特性。「基姆高」講到明淨係小圈子貨幣，只可以喺當地商店使用，如果你三個月之內唔使晒手上嘅「基姆高」，就要交2%負利率。
雖然「基姆高」同歐元嘅兌換率係1比1，但假如你想將「基姆高」兌番做歐元，要畀成10%手續費。所以發行類似「基姆高」嘅地方貨幣，變相鼓勵民眾幫襯多啲當地商戶，刺激當地經濟之餘，又可以鎖住當地財富，簡直係一石二鳥。