孖妹S檔案：搜尋盛股大作薦

蘇：新鴻基金融資料研究部分析員蘇沛豐（Daniel）

楊：輝立證券研究分析員楊宗潮（Kenson）

蘇沛豐指，如果重農行可以披露多啲財務資料，會更受投資者青睞。（胡耀威攝）	楊宗潮認為，中海石化嘅股價可升至7.88元。（梁耀榮攝）	放大圖片

「剩股」成交低 走勢曳

彩兒： 高妹，依家個個都喺度講緊「剩女」要點樣去求愛吖！

高妹： 依家好多女仔都問「有無好男仔介紹？」，計我話不如實際啲，搵吓有無好「股」仔介紹仲好啦！

彩兒： 其實金融戰場上都有好多「剩股」，當中不乏滄海遺珠，大有機會跑出變身「盛股」！

高妹： 我本身唔識人生教練同兩性專家，但金融專家就識唔少！Daniel同Kenson都係金融界嘅後起之秀，一於問吓佢哋有咩「剩股」有升值潛力，等我哋淘吓金啦！

彩兒： 好呀，「剩女」嘅重點係喺個「剩」字，泛指一啲因擇偶條件較高而搵唔到理想伴侶嘅女性，「盛女」轉用「盛」字，取其「豐富、興旺」嘅正面意思，指一啲自身條件較好嘅女士們。若套用喺股份上，「剩股」同「盛股」會係啲咩類型嘅股份呢？

　蘇： 「剩股」嘅基本因素可屬好亦可屬差，但走勢卻會較差，成交量亦低，亦會長期跑輸大市或同業；相反，「盛股」本身嘅基本因素良好，只係喺市場氣氛以及其他因素影響，暫時禾稈冚珍珠咋。

高妹： 哦，兩性專家提出與人交談時，若用45度姿態會留下較好印象，唔知揀股又有咩妙計呢？

　蘇： 我會先看管理層質素，因其營運模式可以直接影響盈利能力，另外，資產負債表亦係重要因素之一，可反映公司嘅財務狀況。

　楊： 毛利率及淨利率係兩大指標，可顯示出公司嘅營運及成本控制能力有咩過人之處，而市盈率亦可反映公司價值係咪處於合理水平。

盛股一：葉氏化工（00408）

Kenson話齋，化工股大部分較少人注視，葉氏化工都係其中之一，上周五成交額得約361萬元，咁係因為散戶唔熟悉化工行業所致。葉氏化工係全球最大酯類溶劑生產商，舊年銷售增長逾17%，但溢利卻下跌23%，點解銷售與利潤會背道而馳？Kenson解釋，內地成本上漲係主要原因。

既然如此，呢隻股份會唔會一直「剩」落去而唔會變成「盛」股？Kenson認為葉氏化工嘅長遠發展樂觀，唔難達到一百億元嘅中期目標銷售額，惟要控制成本問題。「其實葉氏化工可投放多啲資源喺研究及開發方面，藉研發新技術以減低對原材料嘅依賴，提高競爭優勢，達到高效能而低成本。」此外，由於大市仍然波動，投資者宜選取防守性較高嘅工業股；長遠而言，葉氏化工可升至6.5元。

盛股二：中怡精細（02341）

「呢隻股份嘅交投非常疏落，市盈率更係低殘，只有4.98倍，相對同業可謂大幅落後。」Daniel表示，雖然中怡精細受投資者歡迎，其資產負債表相當健康，擁有約二億元現金流，料唔會有走數及倒閉嘅危機，加上業務收入穩健，另管理層亦喺度回購股份，反映前景展望樂觀，股價可上望2.2元。

既然背景條件咁好，點解咁少人留意？Daniel稱工業股嘅派息比率普遍較高，但佢嘅派息比率得15%，加上近期受民企風暴衝擊，故未能獲得投資者嘅芳心。Daniel建議佢可加派息比率，吸引一眾好「息」散戶。

盛股三：華潤電力（00836）

上年因燃料成本上升，唔少電力股出現盈利倒退，華潤電力係其中之一，舊年利潤下跌9%。然而，今年煤價回落，Daniel相信潤電嘅成本開支可減少，加上電價上升有利公司嘅盈利能力，預計股價可喺業績公布後逐漸回升至16元水平。

「剩女」需改善外觀去尋覓異性，未知潤電又可以點樣吸引投資者嘅目光呢？Daniel笑言潤電並唔需要「整容」，可藉由母公司注資，擴展煤礦及風電業務，重拾投資者嘅賞識。

盛股四：中海石化（03983）

中海石化的母公司是中海油（00883），Kenson指，「市場長期聚焦喺母公司嘅發展，遺忘咗中海石化。」話雖如此，中海石化嘅發展前景實可看高一線，因公司主要喺內地從事生產同銷售化肥、甲醇及化工產品，相關需求有增無減，舊年中期銷售收入更提升逾六成，加上中央支持農業發展，有利化肥等材料嘅需求及價格上升，故此Kenson認為其股價可升至7.88元。

Kenson表示中海石化之所以被人遺忘，係因為投資者唔熟悉化肥、甲醇呢類產品嘅特性。他認為中海石化可走出中國，邁向國際市場，增加品牌知名度，更可吸引海外市場嘅機構投資者。

盛股五：重農行（03618）

Daniel稱，市場過分憂慮內地經濟「硬着陸」風險，亦擔心地方債務問題，以致整個內銀板塊都「剩剩地」，而重農行更受到薄熙來事件影響，上周股價累挫10.9%，成為內銀股當中最「剩」嘅股份。不過，薄熙來落馬一事乃政治因素，並唔代表銀行嘅盈利會消失，加上中央扶持三農，農業相關貸款需求亦因而增加，有利重農行嘅盈利前景，所以認為股價可以升回5.25元水平。

Daniel又指，如果重農行可以披露多啲財務資料，會更受投資者青睞，因地方債始終係內銀股嘅隱憂，投資者仲會擔憂高危貸款及壞帳嘅風險，若然能提高資產負債表嘅透明度，便可增加投資者嘅信心。

高妹、彩兒

若有料報畀高妹同彩兒或有嘢問，可電郵money.biz@opg.com.hk