絲絲講場:史玉柱相約馬雲等富豪為自己搞「追悼會」

橋唔怕舊,最緊要受!電影《非誠勿擾2》內有一段劇情,係由葛優飾演嘅秦奮,為尚在人世嘅李香山舉辦「人生告別會」,巨人網絡董事長史玉柱、阿里巴巴主席馬雲及新希望集團董事長劉永好等一班內地富豪,唔知係咪太鍾情呢個橋段,竟然有樣學樣,相約舉辦一個集體「追悼會」,並計劃每個人為自己致悼詞!

結束過去 開始未來

尚在人世就為自己搞「追悼會」聽落真係唔多吉利,史玉柱喺自己嘅微博主動宣布,佢本人與馬雲、劉永好等共7人,喺重慶研究決定舉辦一個集體追悼會,為嘅係「結束過去,開始未來,日後每活一天就淨賺24小時,珍惜每一天,充實每一天,快樂每一天」。

史玉柱呢篇博文一出,自然引來網友熱議,有內地媒體更向史玉柱追訪,佢就話呢個建議係由7人之中嘅萬通集團董事長馮侖先提出來,有此想法係一時興起,至於「追悼會」嘅舉行日期雖然未有定案,但就有唔少網友話到時即使要買票亦要入場參與「追悼」!之不過,電影入面嘅李香山係因為患有重病先至提早搞「人生告別會」,佢哋唔怕畀人誤會咩?

余絲韻

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!