市場熱線：中旅博見底回升

牛熊分界線要企穩兩日先可確認升勢，如果今日再跌穿埋22,500點，咁就變成「假突破」，呢兩日要寄望美國嘅就業數據生生性性，否則又會牛去熊來。

大行睇好內銀翻身

內銀股呢排食咗瀉藥，穆迪仲踩多腳，話地方債報細數，好多股東驚係無底深潭，所以紛紛沽之而後快，坡佬減持建設銀行（00939）同中國銀行（03988），加埋農行（01288）下個禮拜禁售期滿，美銀有大批建行股份等住賣，連自己友社保基金都減持工行（01398），真係一沉百踩，最慘係光大銀行上市計劃可能又要拖住。不過，好多大行反而認為係入市良機，到下月派成績表時可以挾死班淡友，所以散戶尋日已築起血肉長城狂買建行。

穆迪搞內地錢莊，標普搞葡萄牙，加埋之前民企風暴，老美同班打手最鍾意搞風搞雨轉移視線，總之唯恐世界不亂。當雨潤食品（01068）同華寶（00336）開始回穩，另一芬佬愛股寶姿（00589）尋日亦被洗白白，雖然公司喺大陸做生意，但唔係民企，老細係海外華人，大跌原因係花旗將公司目標價由24.5元大削到15.6元。

地主股呢排表現好番啲，先係四叔密密增持恒地（00012），跟住今年「大好友」李超人再出手買長和（00001及00013），依家連郭氏兄弟都唔執輸增持新地（00016），唔通香港樓市仲有排升？古勝又覺得未必係，啲計身家排名通常都係計揸住股票嘅市值，如果四叔不斷增持，容乜易個有錢佬排名榜會執位㗎？

稀土呢排又多多消息，日本話發現海底有大到無倫嘅稀土資源，另外世貿又話中國限制稀土出口違規，即係祖國嘅稀土優勢隨時冇咗，但離奇係中國稀土（00769），舊年因限制出口而大升，依家有機會解禁之下，尋日亦逆市上升7.7%，總之乜都有得炒。

古勝以前對祖國酒店股冇乜好感，皆因供應太多，搞到入住率不斷下跌，房租亦升唔起。不過，呢兩年唔同晒，因為依家同胞實在太有錢，連跟旅行社都費事，鍾意個人遊同自駕遊，所以睇各間上市公司嘅酒店業務都有明顯好轉，香港中旅（00308）亦話今年頭四個月酒店業務收入有雙位數增長。

憧憬業績有所改善

中旅貴為本港唯一綜合類旅遊股，講股價真係失禮，原因係連續幾年成績表都令人失望，吹到自己個海泉灣度假區同芒果網點好，但結果賺大錢冇份、蝕錢就有份，所以股價亦跌到最低1.25元，咁多年來穩穩定定嘅業務得辦回鄉證同埋世界之窗等景點。

不過，古勝認為中旅股價已經見咗底，主要係如之前所講同胞太過疊水，個個景區假日都逼滿人，佢嘅酒店同景點業務最得益，連珠海海泉灣都話已扭虧為盈，而華潤電力（00836）嘅舊老細王總已入主中旅做CEO，所謂新人事新作風，仲預告今年會有單重大收購。

當然，中旅股價表現長期失望之後，要靠下個月派嘅中期成績表令人回復信心，業績好自然股價升，業績差就衰多兩錢重，但酒店同海泉灣盈利改善，點都信埋佢今次。

戰報

雙樺控股（01241）+35%

高仁上月三十日叫大家留意雙樺，若當日在最低位1.34元入市，到尋日最高見1.81元，最多可賺逾三成半。

古勝