絲絲講場：麥定思憂英銀行齊「墜機」
依家英國正進行銀行業改革，絲絲尋日睇到渣打集團（02888）財務董事麥定思（Richard Meddings）接受英國《獨立報》嘅一篇訪問，佢用咗一個幾貼身嘅比喻，形容目前英國嘅銀行業情況。
Richard話，銀行就好似一架飛機，作為管理層理應可以控制飛機作安全飛行，不過如果空中交通情況好混亂，所有飛機都會全部墜毀。佢即係暗示依家市場情況好混亂，英國政府之前提出硬性規定，要求銀行嘅核心資本充足比率達10%嘅頗高水平，令到銀行嘅監管成本好貴，所有銀行都難以獨善其身。
其實依家歐美嘅經濟都未復甦得晒，銀行做借貸根本冇乜利潤可言，所以佢哋都已經好自律咁放貸。莫非Richard係想向英國政府暗示，佢哋咁樣監管其實冇乜彈性，未必適合依家嘅經濟情況？
余絲韻