市場熱線：華創買得夠安心

其實尋日反彈係冇乜好消息，只不過係超賣之後補番啲空倉，結果收市前愈挾愈高，但成交仍係得604億元，下晝沽空亦回升至超過一成，顯然空軍意猶未盡。恒指同國指回升主要係內地錢莊股帶動，尋日公布嘅上月新增貸款得5,500億人仔，係差過預期，但新增貸款減少嘅另一演繹係未來條水喉唔使鍊得太緊。

樓市走勢繫大陸水

除咗中信泰富（00267）受袋鼠國收資源重稅影響而大跌5.72%之外，地主股亦普遍下跌，政府出咗兩招之後嘅周末樓市成交即縮，每次政府出招例必短期縮窒，買家望減價、賣家個價又企硬，跟住買家見新招冇料到又死死氣追價。有人話樓市仲有排升，因為仲未夠癲，但古勝覺得風險愈來愈大，主要睇大陸水幾時斷。

今日祖國會公布CPI等數據，5.5%係預測中位數，但五月數據未公布，孖屐已預計六月CPI會破6。古勝覺得就算係加，加息機會大過加RRR，因為中小企缺水嘅問題好嚴重。

尋日升跌股數都係一半半，中國稀土（00769）、中綠（00904）同「中投三寶」都回升，但MI能源（01555）、時富投資（01049）同第一視頻（00082）等連跌幾日，有錢嘅公司同老細可以趁低回購或增持，有傳話QDII入貨，但次次反彈都係傳社保、匯金或QDII托市，橫掂冇人知堅定流，滬綜指亦跌幅大為收窄至重上2,700點關口。

曼聯想來香港上市，班紅魔躉會唔會踴躍認購呢？但作為球迷同股東係兩回事，做球迷梗係想隊波買多啲球星返嚟爭取好成績，但做股東則想同公司慳錢，所以奉勸各位球迷唔好做股東，除非你同自己個荷包過唔去。

電力設備股尋朝一早已上升，古勝推介哈動（01133）嘅時候已分析過原因；銀基（00886）尋日派成績表前升3%，同新高所差無幾，做經銷商可以有91億元市值都算佢巴閉，但在下覺得咁高估值買間中介公司其實風險幾大。而講到穩陣，華潤創業（00291）亦係其一，最大業務係超市，第二大係啤酒，第三大係五豐行，都係同民生息息相關行業。

兩大業務繼續睇好

華創零售業務首季賺多16.2%，同店銷售增長12.7%，未來可以繼續保持雙位數增長，台資超市大潤發將合併法資歐尚組成「高鑫零售」就快喺香港上市，華創亦可炒吓影子股概念。

華創嘅雪花啤酒已做咗內地一哥，首季啤酒銷量升10%，但因小麥等成本上升令毛利率下降，但夏天係啤酒業旺季，所以可以用銷量彌補毛利率下降嘅問題。華創估值講真一啲都唔平，港股今時今日預測PE超過20倍嘅股已經唔多，「趴打」（01913，現中文名叫普拉達）同「喼神」（01910）咁出名都係呢個PE，但華創喺咁嘅市況都可以企喺30蚊樓上，主要原因係業務穩陣兼可以年年保持增長，公司今年亦計劃進行收購。華創肯定係長線投資選擇，但大潤發上市亦有短線帶動作用。

戰報

銀基集團（00886）+13%

經濟學家關焯照夠眼光，五月三十日睇中嘅銀基表現堅挺，尋日高見7.69元，以推介日低位6.81元計，已賺近13%。

Z-OBEE（00948）+15%

帥哥上周三推介嘅Z-OBEE尋日高見2.26元，以當日低位1.97元計，跟到足食胡可賺近15%。

古勝