呂方湊「女神」失守流淚

56歲的呂方結婚、生女「一Talk過」，日前接受專訪時，更有愛妻伍惠寶（Rainbow）做司機接送。談到囡囡時，呂方的矇豬眼立即變成「腰果眼」，直言很享受「愛的枷鎖」：「以前鍾意自由自在，依家有下一代責任好大，囡囡未出世前已經好多嘢諗。（有產前抑鬱？）係產前少少混亂同憂慮啫！好似幫個女改名咁，又查書、問姓名學、又搵師傅夾八字，會重心考慮『呂晨』。」

監視玩跟蹤？

呂方不諱言曾怕小朋友吵鬧哭泣，幸而囡囡很乖巧：「除咗肚餓，佢唔係好喊，我叫佢做「『呂即停』，因為佢一食奶就收聲，我好鍾意抱住佢周圍行，同埋索佢嘅香味。」雖然Rainbow不准他過分寵囡囡，但他直言一聽到BB喊聲就心痛，更被囡囡搞喊：「我失戀都唔喊，但有次見到個女笑，我又望吓佢媽媽，同佢終於有個咁可愛嘅BB，啲眼淚喺眼眶度，係感動到喊！」問到可會考慮為女兒添個弟弟？他坦言：「希望啦！不過啲人話生女好過仔，因為將來會多個仔（女婿）。」

家有B女，呂方與Rainbow的感情更進一步。	呂方直言囡囡日後一定要學好中文及自立。	Rainbow做司機接老公離開。

屬緊張爸爸的呂方，已為個多月大的囡囡籌劃未來，表示會親自送囡囡返學放學，更幻想她長大拍拖，不排除擔心到玩跟蹤！他又計劃移民，為囡囡提供最優質的教學，但絕不做「怪獸家長」催谷她做尖子：「要等佢消化到先得，一定要學中文，仲要學識獨立，唔識洗碗唔係光榮嘅事。」

諗過30歲退休

他坦言囡囡出世後，夫妻感情再昇華，以前與Rainbow會為小事鬧意見，現時則凡事磨合，他笑說：「喺屋企唔係講道理嘅地方，尤其係同女士，依家識四両撥千斤。」又指太太不是圈中人，所以Rainbow拍拖前「唔知我係乜水」，他不禁笑說：「我拍《新紥師兄》時，佢得幾歲咋！」

此外，他自爆30歲時曾想過退休，不過近年又覺得工作可以保持存在感及留住青春，所以才打消念頭。談到本來計劃於12月舉行紅館個唱，卻受疫情影響要取消，他大嘆可惜，明言會再申請檔期。