林鈺洧言論大膽老竇撐做性女

「星二代」林鈺洧（Denice）憑高挑身形入行做模特兒，早前在ViuTV節目《對號入座》大方分享性史。她坦言敢做敢認，但不代表對性開放：「有網民抨擊我，話我不知廉恥，乜都講出口。我好唔開心，因為我唔係隨便，（性伴侶）一隻手數得晒。我之前得5個男朋友，我只係喺節目分享唔同星座男伴嘅性經歷，但啲人覺得我好開放。其實我對男女關係好傳統，要拍拖後先可以發生關係。我講得咁興奮，係我真係有相關經驗，好似我去咗個悠長假期返嚟同大家分享，係幾咁開心愉快。」

收「有味」私訊

節目播出後，引起很大回響，她直言多了粉絲和支持者，讚她說話夠真之餘，又有搞笑一面，甚有擔當主持的天分。但同時她收到不少網友的「有味」私訊，她說：「收過『我可以讓你翻天覆地，流晒汗』、『聽說你很大吃』呢類型嘅說話。」

「又唔係搶人老公」

問到如何處理？Denice表示沒有回覆：「話我大食，係，我好鍾意食零食，呢個世界真係咩人都有。」問到父親有否不滿她講性史？她說：「有同佢講我有個新稱號叫『性女』，叫佢唔好介意，佢反而話：『我冇所謂，你咪大方啲去講，呢啲冇咩嘢，你又唔係去搶人老公，唔係周圍玩一夜情，又唔係做啲缺德嘅嘢，好多騷都講呢啲題目。」她直言得到父親安慰後減少壓力，心情頓然舒暢。