林超賢愧對蔣璐霞：冇當過係女人！
導演林超賢近年的電影作品票房與口碑俱佳，執導的英皇電影《紅海行動》日前入圍今年金雞獎多個大獎，他對此大表興奮，不過直言對入圍最佳女配角的蔣璐霞有所愧疚，因為拍攝期間沒有當對方是女人，令她吃盡苦頭，壓力甚大！
英皇電影《紅海行動》全球票房破45億港元，在多個影展獲獎，該片更入圍下月23日在廈門舉行、第28屆金雞百花電影節暨第32屆中國電影金雞獎3個大獎，包括「最佳故事片」、「最佳導演」（林超賢）以及「最佳女配角」（蔣璐霞），林超賢更是唯一入圍「最佳導演」的香港代表，他直言：「相當興奮！」
對廈門有情意結
林導去年憑《紅》片橫掃大眾電影百花獎多個大獎，今次再獲金雞獎提名，他固然開心：「百花獎以觀眾投票為主，上次得獎已經好開心，金雞獎則由專業評審評選，連續兩年憑《紅海行動》參與其中，自然係加倍興奮！據聞今年頒獎禮喺廈門舉行，我曾經喺當地拍攝新片《緊急救援》，更添一份情意結！」對於蔣璐霞入圍女配角，林超賢很開心見到其努力獲得評審與觀眾賞識，但坦言有點愧疚：「我要衷心感謝蔣璐霞及戲中一班女演員、女同事，其實喺拍攝過程中，我心入面從來冇將佢哋當成女人咁睇，所以佢哋真係承受咗好多，非常辛苦！」
陪彭于晏下海定驚
現正製作電影《緊急救援》後期的林超賢，直言新片中令彭于晏（Eddie）受最大「折磨」：「呢套戲最困難係克服恐懼，身處水底之下，已經唔能夠淨係用意志令自己冷靜。合作以來，我從未聽過Eddie講一個『驚』字，但呢次佢真係喊驚，真係怕！（點樣安撫佢？）惟有同佢講，其實我都好驚，要驚，大家一齊驚！」他更身體力行，堅持陪彭于晏落水拍戲，給予信心。