自比玄彬享艷福 蕭正楠：成村女人鍾意我！
蕭正楠昨日與湯洛雯為無綫新劇《一笑渡凡間》在將軍澳電視城古裝街開工，飾演濟公的他艷福無邊，除了獲湯洛雯垂青，簡淑兒亦會色誘他，蕭正楠笑說：「我直情係古裝版嘅玄彬，成村女人都鍾意我，不過只係戲內，戲外有鬼人睬我咩！哈哈。」
他早前「拗柴」未痊愈，加上近日左眼爆微絲血管，變成容易受傷的男人：「翠如話再係咁唔畀我拍古裝，因為佢知道我拍動作戲唔錫身，隻腳仲有少少腫，但係唔痛就當冇事（口架）喇！」對於政府實施的「限聚令」涉及影視圈拍攝外景，問到對劇集可有影響？他說：「暫時冇，因為我哋喺錄影廠同公司嘅古裝街開工。自己對條例唔清楚，但係相信公司叫得我哋去拍，應該都係合法。」
湯洛雯冇供樓壓力
疫情下公開活動大減，湯洛雯坦言搵真銀的工作也受影響，幸有儲蓄習慣，才不至於太徬徨。問到早前購入豪宅可有供樓壓力？她說：「暫時冇，因為供樓計劃可以5年後先開始供，但係屋企咁多人，生活要開支，希望盡快重回正軌。」