張曦雯去得太盡驚女神崩壞
藝人張曦雯（Kelly）於新劇撇下靚女包袱，豁出去演笑匠，自嘲擔心女神形象幻滅，拍檔羅仲謙卻大讚Kelly，指她有潛質！對於太太楊怡屢傳懷孕，謙仔斷然否認，笑言一切隨緣！
羅仲謙、張曦雯、張文慈（Pinky）、張秀文及韋家雄等昨日出席無綫劇集《木棘証人》開鏡，大晒纖腰的Kelly非常養眼。謙仔透露二人在劇中有浪漫甜蜜戲份，但不會過分激烈，問到是否太太楊怡在背後出手阻止？他笑說：「佢啲級數咁高，我控制唔到啦！」開劇已一段日子，謙仔與Kelly漸有默契，大讚她表現不俗：「佢演戲係豁出去嗰隻，放低咗靚女嘅包袱，所以好欣賞佢。」Kelly則笑指因有謙仔及韋家雄在場，令她非常有安全感，演出時也大膽去到盡，更透露今次角色有別以往：「第一次演搞笑，我驚放過頭添，令大家對我嘅女神形象幻滅咗！」
有生仔秘笈冇耐力
而謙仔對於楊怡經常被傳有BB，說：「我日日都見到佢，如果係真嘅，講咗咁耐，我應該可以帶埋個小朋友開工添，出咗世搵學校啦！但真係唔係，隨緣啦。（成日有傳言有冇壓力？）大家都係祝福我啫。（黎燕珊話傳授咗啲招數畀你！）有啲咁嘅事？就算有我都冇咁嘅耐力，因為呢排我實在太眼瞓。」
張文慈仆親拗柴
至於Pinky右腳踝有傷口滲血，行路一拐一拐的她表示日前拍攝追車戲，劇情要求她連跌兩次，結果她認真仆時，不慎扭親：「我不嬲膝蓋有事，好耐冇去打『啫喱』，所以好弱。（唔睇醫生？）唔使，搽啲消毒藥水就得。」