阮政峰拖喊包女友北海道放閃

阮政峰與林凱恩2016年因拍攝無綫節目《甜心先生》傳撻着，近年二人拍攝處境劇《愛．回家之開心速遞》人氣急升，為保事業轉玩地下情，但原來已和平「分手」，二人出席活動時合照更尷尷尬尬。男方隨即宣布有圈外女友，原來他情傾23歲咖啡師Liz，更不時在社交網洩蜜，令女友身份曝光！

據知，二人經朋友介紹認識，拍拖初期，阮政峰為保持低調，未有上載「愛的合照」於社交網，反而Liz則愛上載與男友合照「公告天下」，非常甜蜜。同樣愛好攝影的二人，各自開設個人攝影社交網，Liz更為男友擔任模特兒任影，當中除了騷長腿外，更有唯美黑白「床照」。

撻着半年 笑女友為食

早前二人飛到北海道旅行，為紀念甜蜜時刻，拍下短片與眾分享。片段中二人不時放閃，當Liz在機場因未能吃快餐店的薯餅，即場爆喊，阮政峰即取笑女友：「堅喊呀，大鑊啦呢次！」認真搞笑。昨日他接受本報電話訪問，講到感情生活，他說：「佢係咖啡師。（拍咗幾耐？佢係咪好易喊？）我哋都大半年o架o喇，佢唔算易喊，只係為食啫！」而「舊愛」林凱恩至截稿前未有回覆。