阿叻直認冇份飲：我同佢唔使講嘢！
藝人陳百祥（阿叻）與曾志偉多年好兄弟，以往不時隔空互窒。不過，志偉上周五榮升新老爺，竟沒邀請阿叻前往日本觀禮，他坦言：「我唔知，佢冇邀請我喎！」莫非友情不再？
阿叻昨日現身足球隊與健身中心的合作活動，笑稱冇工開，現時唯一工作是每朝睇晨操，隨後便去健身或打Golf。提到曾志偉兒子曾國祥與王敏奕上周五在日本舉行婚禮，可有獲邀觀禮？阿叻坦言：「我唔知，佢（志偉）冇邀請我喎！（嬲佢唔請你？）冇！每個人有佢自己主意同生活，佢阿仔同佢去得都想靜靜哋，想Family啲！」
不過，記者指當日很多圈中人都飛往當地觀禮，阿叻只說：「OK啦！咁呢啲唔係老竇話事，個仔結婚就係個仔話事，鍾意請邊個就邊個。（唔嬲佢冇叫你？）梗唔會啦！咁我同國祥唔熟，同志偉熟啫。（就係要嬲志偉囉！）一定唔會，我同佢唔使講嘢嘅。（唔講嘢？即係冇偈傾？）我哋係好Friend啫！」
晒私訊證友情不變
為免大家「諗多咗」，阿叻主動騷出手機，讓記者聽由志偉傳給他的語音私訊，力證立場不同但友情不變：「佢啱啱先祝福完我，因為我尋日打Golf，人生第一次打出『Hole in one』（一桿入洞），佢都話我犀利，咁難打都打到，恭喜我添！我就話請佢同阿倫（譚詠麟）食飯囉！」阿叻稱打高球多年，只有太太黃杏秀試過一次一桿入洞，就連阿倫、志偉都未試過。記者讚他又再叻過兩位老友，阿叻竟難得不認叻：「呢個我就唔認叻，因為唔係靠技術，純粹係講運氣啫！」