地獄式戒口！鄧佩儀望男友包容
藝人黎諾懿、鄧佩儀、麥美恩與戴祖儀等昨午出席節目《長命不老》記者會。戴祖儀日前貼中港姐三甲而贏得20萬港元，席上倒轉做運動時被「逼供」，她即說：「我會畀8萬8諾懿祈福，放我啊！」
鄧佩儀自爆19歲開始就注重養生：「隔幾日就沖杞子紅棗茶，已經好多年冇食煎炸嘢，依家最唔健康係飲珍珠奶茶！」又坦言一年最多食兩次火鍋：「要清湯底唔加醬料。（咁咪冇晒朋友？你個人好悶！）我都有約朋友嘅，最多咪坐喺度囉！」打趣指不擔心找不到男友：「真係愛我就會包容！」黎諾懿則透露注重飲水：「屋企裝咗水機淨化氯氣，淨係飲鹼性水，事關太太皮膚敏感，醫生曾經話佢中甲醛毒，依家所有敏感症狀都冇晒！未識太太前，我扭開水喉就飲水，太太問我係咪黐線！」
