馬國明留後路添恨享齊人之福

郭晉安、馬國明及李佳芯等前晚出席無綫劇集《白色強人》祝捷晚宴，該劇大結局七天跨平台總收視32.1點，逾2,100,000名觀眾收看。對於收視報捷，問馬國明會否希望盡快開拍續集？他說：「要睇吓編審嘅心思，如果佢哋覺得故事已經去到好盡，就無謂勉強落去，留番個靚嘅結尾就好喇！但如果真係開拍續集嘅話，我都好樂意，今次拍得好開心。（大家對你揀唐詩詠定李佳芯好有意見喎！）每個人都可以有唔同嘅睇法，如果問我嘅話，Why not both？（李佳芯話劇情交代佢死咗，冇得拍續集。）咩啫！交代聽到槍聲之嘛，可能佢搶咗支槍呢！」

搵蕭正楠擋箭

任達華早前在內地出席活動時遇襲，將在內地登台的馬國明表示不太擔心人身安全：「其中一場夥拍蕭正楠，佢話會着盔甲，有咩事推佢出去頂住先！（喺內地有冇遇過啲熱情粉絲？）試過有次我喺夜店登台，台下有個客飲到好醉，竟然攞個榴槤掟上台，我真係忍唔住笑。」

何廣沛有馮盈盈（左）及吳沚默傍住，招積派心。	朱智賢變「傷膝」人士。	郭晉安高舉紙牌報捷，超興奮！

至於郭晉安對於開續集大表支持：「最好一年內，過兩、三年嘅話就拖得太耐，觀眾會淡忘，其實監製剪完片都已經講要開續集。」談到早前與11歲兒子歐遊，他說：「其實我想佢認識唔同種族嘅生活，估唔到佢又幾捱得，有時落咗火車要推個篋行15分鐘o架！（囡囡冇呷醋？）我爭佢一次（旅行）囉，佢係一個好窩心嘅女仔，冇詐型。」

Ali避過扮死

李佳芯（Ali）劇中角色生死未卜，成為網民熱話，她笑說：「我有問過編審，佢話想帶出人生無常嘅道理。佢好好喇，冇拍我條屍，唔似《踩過界》Never（角色名字）咁慘，連墮崖身亡都要拍埋！」問到是否支持拍續集？她表示暫時不清楚：「或者因為角色死咗，下集冇我份啦，如果翻生又太奇怪嘞。」