張繼聰恨孖周秀娜「俠」體搞笑
近年演技獲外界好評的周秀娜及張繼聰，於新片連場鬥戲擦出火花。娜姐笑指阿聰鬼主意多多，令她喜劇功力大增，阿聰則讚對方可塑性強，更有搞笑天分，下次想一齊演武俠小說的俠侶！
周秀娜與張繼聰合作電影《女皇撞到正》後加深認識，互笑對方「夠癲」。阿聰說：「你知佢眼又大、輪廓又深，唔出聲時會有啲氣場。拍之前諗住同佢傾劇本，佢就話等佢研究吓先，我諗可能係自己多事啦！點知兩日後佢搵我，已經睇咗好多Reference，仲同我一齊加好多搞笑嘢入去。有一場戲佢同邵美琪、葛民輝有內心戲，拍攝進度好急，但佢好快入戲，唔怪得提名影后，我當時都有投佢一票o架！」
講笑至高境界
娜姐直言在阿聰身上學到很多演喜劇的秘訣：「佢真係癲o架！佢演喜劇節奏好好。我一向畀人感覺認真，呢套有好多輕鬆位。」阿聰則指她很搞笑：「佢搞Gag嗰陣身邊人個個爆笑，但佢自己忍到唔笑，係一種相當高嘅境界。」
「我都係做尹志平」
今次是二人第三次合作，但之前兩齣電影甚少對手戲，今次他們則愈演愈有默契，阿聰提議娜姐可演以下角色：「我想睇佢演柔弱、為仔死為仔亡嘅女仔，貼身膏藥咁。（你做男主角？）呢啲對手要係梁朝偉、古天樂先得。（咁你哋再合作的話演咩好？）我鍾意睇武俠小說，一齊演古裝囉！（楊過同小龍女？）佢可以，我就唔得！大個就明白有啲角色唔係屬於你，我都係做尹志平啦！其實我哋都鍾意《笑傲江湖》，一係演令狐沖、任盈盈，諗吓唔會畀人打啩？」
周秀娜服裝：ETRO
張繼聰髮型：Jobbyli＠Leighton Aveda