謝賢認分手：乜都一個人好枯燥！
藝人謝賢前晚與狄波拉、薛家燕及胡楓等出席公開活動齊齊歎鮑魚，由於有傳81歲謝賢與拍拖12年的32歲上海女友CoCo分手，席上談及目前生活時，他直認已甩拖：「我就冇拖拍，一個人住一間屋，起身對住個海，乜都一個人好枯燥，有少少嘢做我開心啲，依家似坐監咁！好似《12道鋒味》叫我出吓鏡，收番兩個錢使吓！」
掌摑曾江「做戲啫！」
問到可會再想去旅遊節目？他稱不介意，再問如與曾被他掌摑的曾江合作又如何？他竟說純屬做戲：「黐線！不知幾Friend，嗰時做戲啫！真到不得了！（眼鏡飛晒出嚟喎！）佢專登做，老戲骨，用手指撳住副眼鏡，嗰時問晒我哋四個，叫胡楓做，佢講唔好咁樣，鬼聽佢咩，最後我去做，擺我上枱，我冇所謂，醒佢一巴幾過癮，點知後來個個指住我鬧，幾陰功。」更指曾江被摑當日，有請對方食雪糕，畀對方凍番塊面。