湯怡零收入「窮」追夢想
英皇藝人湯怡捱了十年，終於給她等到在電影中擔正女一，曾飽受過辛酸「零蚊」的日子，有想過轉行尋求安穩的工作，慶幸她堅持夢想，找到屬於自己的一片天。
獲公司力捧的湯怡為東網巨星節目「海馬牌床褥特約」《閨蜜睡房》擔任嘉賓，與主持李惠儀（Kiwi）暢談她的內心世界，入行十一年的她最近在電影中首次擔正女主角，雖然好多人覺得她遲遲先有這機會，但她並不認同，反而覺得時間剛剛好，她說：「如果早幾年或者早十年畀呢個機會我，可能我冇咁嘅經驗或者歷練去做呢個角色，依家係個好嘅Timing去把握。」
諗過轉行做空姐
她坦言過去試過零收入，亦有想過如果不做娛樂圈，或會投入空姐行業，她說：「我好多嘢都受家姐影響，例如我讀商科、打排球都係受佢影響，因為佢做空姐，所以我都有諗過去做。」在沒有收入的日子，她全靠「積蓄」過活，她說：「我好鍾意儲錢，因為冇錢我覺得好冇安全感，尤其是我哋呢行已經唔穩定，如果再冇啲儲蓄支持，個人會更加徬徨，我真係有諗過係咪要出去打工，有份穩定收入，但最終因為自己鍾意呢行，就再堅持落去。」
在讀書時間未拍過拖的她，直認有後悔過，想知道湯怡更多秘密及其愛情世界，記得本星期五、六、日收睇《閨蜜睡房》！
