古巨基口甜舌滑讚老婆愈嚟愈索
歌手古巨基（基仔）出席醫學美容品牌分店剪綵儀式，林盛斌（Bob）擔任司儀，期間Bob搞笑提議基仔可做品牌的止汗療程，解決手汗「浸壞」咪高峰的問題，基仔聞言笑指已先後有4至5支咪「難逃一劫」，不過他一直無正視問題。
受訪時，提到基仔在台上大讚經理人太太Lorraine愈來愈索，他冧笑表白：「以前我一直以為佢得內在美，依家發現原來外在美都咁省鏡，你知我愛佢咪得囉！」問到怕不怕太太外貌比自己年輕？基仔即說：「最好係咁，有好多人都話我凍齡添！」他經常被指與孫中山先生「撞樣」，問他會否自資拍以孫中山為主角的電影？基仔突然自爆曾被邀請過，惜最後未能成事：「如果時間、劇本都適合，我願意拍o架，撞樣真係好特別！」
Bob𥄫女有理！
同場的Bob表示上星期撇甩太太Pearl，豪使幾十萬元全包超過30名員工去泰國玩。提起被影到大膽從後𥄫住模特兒蔡宛珊，他笑言為搞氣氛，才「飾演」鹹濕佬。問到老婆會否生氣？Bob強調不會：「不過佢每日有Send啲仔女相畀我，我諗佢係有啲嘢想提醒我唔好亂咁做。」又透露暑假將舉家到美國探親補數。
此外，古巨基在無綫節目《StarTalk》大爆與太太之間的甜蜜和搞笑事，他覺得最浪漫是捉太太去拉斯維加斯註冊，他笑說：「其實日常生活都好Sweet，無端端捉佢去睇齣戲，或者同佢講今日乜都唔做，大家去拍吓拖。」問他可有對太太講過大話？他笑說：「唔知佢有冇對我講大話就真，哈哈！有嘅！我話佢好瘦！我好誠實話佢知，要減肥，不過係為健康，唔係為外形。」
文：音樂組
攝：司徒國榮